Haikunterke Haikoshitemturi
Moshiresani kamuiesani tapkashike
chiehorari okayash.
Shineanto ta soita soineash inkarash awa,
pirka neto netokurkashi teshnatara, atuisho kata
Okikirmui Shupunramka Samayunkur
repa kushu resoush wa paye korokai. Shirki chiki
chikor wenpuri unkosankosan.
tapanesannot moshiresani kamui esani
Tapkashike too heperai too hepashi
koshneterke chikoikkeukan matunitara
nitnepause (1) pausenitkan chikekkekekke
tapan petetok chinukannukar shirwen nitnei
chihotuyekar, neikorachi tapan petpo
petetokwano yupkerera shupne rera
chisanasank atuika oshma hontomota
tapan atui kannaatui chipoknare
poknaatui chikannare. Okikirmui utarorke
kon repachip repunkuratui yaunkuratui
uweushi ta anisapushkap kaiuturu
koshikarimpa. Tapan ruyanpe nupuri shinne
chip kurkashi kotososatki. Shirki chiki
Okikirmui Samayunkur Shupunramka
humse tura chipokonanpe kohokushhokush.
Tapan ponchip komham turse shikopayar
chikipokaiki upsh anke shirki korka
ineapkushu ainupitoutar okirashnu wa
shirki nankora tapan ponchip rera tumta
kampekurka echararse.
Chinukat chiki chikor wenpuri unkosankosan.
koshneterke chikoikkeukan matunitara,
nitne pause pausenitkan chikekkekekke
shirwen nitnei sermaka chiush chikoarikiki.
Shirki aine hunakpaketa Samayunkur
tektuika wa tektuipok wa kem chararse
shinkiekot.
Shirki chiki ranki mina chiuweshuye.
Orowanoshui arikikiash
koshneterke chikoikkeukan matunitara,
nitnepause pausenitkan chikekkekekke,
shirwen nitnei sermaka chiush.
Okikirmui Shupunramka etunne kane
ukoorshutke tumashnu assap pekotopo pekoreupa
ikichi aine hunakpaketa Shupunramka
tektuika wa tektuipok wa kem chararse
shinki ekot. Shirki chiki
raukimina chiuweshuye.
Orowanoshui koshne terke chikoikkeukan
matunitara, nitne pause, pausenitkan
chikekkekekke chikoarikiki.
Kipnekorka Okikirmui shinki ruwe oararisam,
earkaparpe eitumamor noye kane
chipokonanpe kohokushhokush, iki aineno
tektuipok ta kor kanchi chioarkaye.
Shirki chiki, shinkiekot Samayunkur
kotetterke kor kanchi eshikari shinen ne kane
chipokonanpe kohokushhokush.
chinukatchiki, chikor wenpuri unkosankosan,
nitnepause pausenitkan chikekkekekke,
koshneterke chikoikkeukan matunitara,
arikikiash shirwen nitnei sermaka chiush.
Ki aineno Samayunkur kor kanchi nakka
chioarkaye, Okikirmui Shupunramka
kotetterke, kor kanchi eshikari,
tumashnu assap pekotopo pekorewe.
Kipne korka nea kanchi ka ruyanpe kaye,
tata otta Okikirmui chiposhketa
chiashtushtekka, yupke rera rera tumta
sennekashui ainupito unnukar kuni
chiramu awa moshiresani kamuiesani
tapkashikun chishiknoshkike enitomomo,
ipor kon ruwe pirka rokpe kor wenpuri
enantui ka eparsere, pushtotta (2) oro oiki kane
hemanta sanke inkarash awa noyaponku
noyaponai sanasanke.
Shirki chiki raukimina chiuweshuye,
"Ainupito nep ki ko ashtoma heki,
ene okai noyaponai (3) nep aekarpe taana."
yainuash kane tapan esannot
moshiresani kamuiesani tapkashike
too heperai too hepashi koshneterke
chikoikkeukan matunitara, nitnepause
pausenitkan chikekkekekke,
shirwen nitnei chikopuntek.
Rapoketa Okikirmui eak ponai ek aine
chiokshutuhu kororkosanu.
Pateknetek nekonneya chieramishkare.
Hunakpaketa yaishikarunash inkarash awa
pirka shirpirka chishireanu, atuiso kashi
teshnatara, Okikirmui kon repachip oararisam.
Nekonne humi ne nankora, chikankitaye wano
chipokishirke pakno tatkararse shikopayar.
Sennekashui ainupito eak ponai ene uniyuninka kuni
chiramuai orowano hochikachikaash,
tapan esannot moshiresani kamuiesani
tapkashike too heperai too hepashi rayayaiseash kor
raiyepashash, tokap hene kuune hene shiknuash ranke
raiash ranke ki aineno nekonneya
chieramishkare.
Hunakpaketa yaishikarunash inkarash awa,
poro shitunpe ashurpeutut ta okayash kane okayash.
Tutko pakno shiran awa Okikirmui kamuishiri ne
arki wa sancha otta mina kane ene itaki : ―
"Iramashire moshiresani kamuiesani
tapkashike epunkine shitunpe kamui,
pirkapuri kamuipuri kor akushu
rai neyakka katupirkano ki ruwe okai."
itak kane, chisapaha uina wa,
unchisehe ta ampa wa, chikannanotkewe
yaikota (4) kor ashinruikkeu ne kar, chipoknanotkewe
machihi kor ashinruikkeu ne kar wa,
chinetopake anak neeno toikomunin wa isam.
Orowano kunne hene tokaphene
shihurakowenash ki aineno toirai wen rai
chiki.
Pashtakamui chine ruwe ka somone akorka,
arwenpuri chikora kushu nepneushi ka
chierampeutek wenrai chiki shiri tapanna.
Tewano okai chironnuputar, itekki
wenpuri kor yan.
ari chironnup kamui yaieyukar.
(1) pau. 狐の鳴聲の擬聲詞。back (2) pushtotta‥‥鞄の樣な形のもので、海獵に出かける時に火道具、藥類、其の他細々の必要品を入れて持つてゆくもの。同じ用途のもので piuchiop, karop などがありますが、蒲、アツシ織などで作りますから、陸で使用します、pushtotta は熊の皮、あざらしの皮、其の他の毛皮で製しますから水がとほらないので、海へ持つて行くのです。back (3) noya ai‥‥蓬の矢。蓬はアイヌの尊ぶ草です、蓬の矢で打たれると、浮ぶ事が出來ないから惡魔の最も恐れるものだと云ふので遠出する時必要品の一つに數へられます。back (4) もとは男の便所と女の便所は別になつてゐました。ashinru も eosineru も同じく便所の事。
狐の中で黒狐は最も尊いものだとしてゐます。海の中に突き出てゐる岬は大概黒狐の所領で、黒狐はよつぽどの大へんがなければ、人に聲をきかせないと申します。
Okikurumi（Okikirmui）と Samayunkur と Shupunramka とはいとこ同志で、Shupunramka は一ばん年上で Okikirmui は一ばん年下だと云ひます。Shupunramka は温和な人で内氣ですから何も話がありませんが、Samayunkur は短氣で、智惠が淺く、あはて者で、根性が惡い弱蟲で、Okikirmui は神の樣に智惠があり、情深く、勇氣のあるえらい人だと云ふので、其の物語りは無限と云ふほど澤山あります。back