Hotenao
Shineantota　nishmuash kusu　pishta sapash,
shinotash kor　okayash awa,　shine ponrupneainu
ek koran wakusu,　hepashi san ko　hepashi chietushmak,
heperai ek ko　heperai chietushmak.
Ikichiash awa,　hepashi iwanshui
heperai iwanshui　ne ita　ponrupneainu
kor wenpuri　enantuika　eparsere,　eneitaki : ―
"Pii tuntun,　pii tun tun !
tan hekachi　wen hekachi　eiki chiki,
tan esannot　teeta rehe　tane rehe
ukaepita　eki kushnena !"
Hawashi chiki　chiemina kor　itakash hawe
ene okai : ―
"Nennamora　tan esannot　teeta rehe
Tane rehe　erampeuteka !
Teeta anak　shinnupur kusu
tapan esannot　'Kamuiesannot' ari
ayea korka　tane anakne　shirpan kusu
'Inauesannot' ari　aye ruwe　tashi anne !"
itakash awa　ponrupneainu　eneitaki : ―
"Pii tuntun,　pii tuntun !
Tan hekachi,　sonnohetap　ehewan chiki
tapan petpo　teeta rehe　tane rehe
ukaepita　eki kushnena."
hawash chiki　itakash hawe　ene okai : ―
"Nennamora　tapan petpo　teeta rehe
tane rehe　erampeuteka !
teeta kane　shinnupurita tapan yetpo
'Kanchiwetunash' ari　ayea korka
tane shirpan kushu　'Kanchiwemoire' ari
aye ruwe tashi anne !"
itskash awa　ponrupneainu　ene itaki : ―
"Pii tuntun,　pii tun tun !"
ennohetapne　ehawan chiki,
ushinritpita　aki kushnena !"
hawash chiki　itakash hawe　eneokai : ―
"Nennamora　eshinrichihi　erampeuteka !
otteeta　okikirmui　kimta oman wa,
kucha karita　keneinunpe　kar aike
ne inunpe　apekar wa　sattek okere,
Okikirmui　oararkehe　oterke ko　oararkehe
hotari. Newaanpe　Okikirmui　rushka kushu
ne inunpe　pet otta 　kor wa sanwa,
oshura wa　isam ruwe ne.
Orowano　ne inunbe　petesoro　mom aineno,
atuioro oshma,　tu atuipenrur　re atuipenrur
chieshirkik shiri　kamuiutar　nukar wa,
aeoripak　Okikirmui　tekekarpe　neeno
yaierampeutek wa　mom aineno　atuikomunin
aenunuke kusu,　kamuiutar orowa
ne inumbe　cheppone akar wa　'Inumpepecheppo' ari
arekore ruwe ne.
Awa,　ne inumpepecheppo,　yaishinrit
erampeutek wa　ainune yaikar wa　iki koran,
Ne inumpepecheppo　ene ruwe tashi anne."
itakash awa,　pon rupneainu iporohoka
wenawena ikokanu wa an aine
"pii tun tun,　pii tun tun !
eani anak　Pon Horkeusani　ene ruwe tashi
anne."
itakkeseta　atui orun　terke humi　chopkosanu,
oshi inkarash awa,　shine hure cheppo
honoyanoya wa　too herepashi
oman wa isan.
　　ari pon horkeu kamui isoitak